Deklarata befasuese e kandidatit të vetëshpallur për president në Austri: Do të rikthej përkrenaren e Skënderbeut në Krujë!

Kandidati i vetëshpallur për president të Austrisë premton rikthimin e përkrenares së Skënderbeut në Krujë

Kryetari i “Austrian Committee for NATO Enlargement”, Günther Fehlinger-Jahn, ka bërë të ditur se do të hyjë në garën për President Federal të Austrisë në vitin 2028. Njoftimin e dha vetë ai.

Përmes një videoje të publikuar në rrjetet sociale, të regjistruar brenda Muzeut të Vjenës, ai u zotua se si kreu i ardhshëm i shtetit do të angazhohet për rikthimin e përkrenares dhe armëve të Skënderbeut në Krujë.

Fehlinger-Jahn njihet si ekonomist dhe aktivist austriak. Prej kohësh ai mbron hapur zgjerimin e NATO-s dhe të Bashkimit Europian, me vëmendje të veçantë ndaj Ballkanit Perëndimor. Është shumë i pranishëm në rrjetet sociale, ku shpesh ndan qëndrime të prera për Shqipërinë, Kosovën, Serbinë, Rusinë, Ukrainën, si dhe për vetë NATO-n dhe BE-në. Pikërisht për shkak të këtyre deklaratave, emri i tij përmendet shpesh në mediat e rajonit.

Lidhja e tij me Shqipërinë dhe Kosovën daton herët. Në një intervistë për “Tirana Times” në vitin 2012, ai rrëfeu se kishte ardhur për herë të parë në Shqipëri në 1998. Më pas u vendos këtu në vitin 2008 dhe jetoi disa vite.

Për Kosovën, ndërkohë, ka zhvilluar fushatë publike në mbështetje të njohjes ndërkombëtare dhe anëtarësimit në NATO dhe BE.

Zotimin e tij e përsëriti edhe me një postim në X më 2 tetor 2026. “As President of Austria I pledge to return Skanderbegs Helmet and Sword to Kruja Albania to honor King Skenderbeg”, shkroi Fehlinger-Jahn, krahas fotos së bashkëngjitur pic.twitter.com/HP9jgrSFG5.