Dalin detaje të reja nga arrestimi i këngëtarit fierak, Erind Xhaferi u procedua edhe dy vite më parë për ngacmim seksual!

Detaje të reja janë zbardhur për arrestimin e këngëtarit fierak Erind Xhaferi. Ai u ndalua nga policia fierake pas denoncimit për përndjekje të dyshuar ndaj vajzave të mitura dhe kryerje veprimesh të turpshme ndaj tyre.

Mësohet se ky nuk është rasti i parë që lidhet me emrin e tij. Rreth dy vite më parë ai është proceduar penalisht pas një tjetër denoncimi për ngacmim seksual të dyshuar. Atëherë ndaj tij nuk u caktua masa e arrestit. Çështja u trajtua ndërkohë me artistin në gjendje të lirë.

Sipas informacioneve, ndërhyrja e fundit e uniformave blu erdhi pas një telefonate në sallën operative. Thirrjen e kanë bërë disa vajza. Ato raportuan rastin e dyshuar që më pas vuri në lëvizje policinë.

Menjëherë pas njoftimit, shërbimet në terren nisën verifikimet. Po ashtu u organizuan veprime operacionale për të dokumentuar ngjarjen.

Në vijim, Xhaferi u ndalua dhe u shoqërua në ambientet e drejtorisë së policisë në Fier. Aty vijuan procedurat e parashikuara ligjore.

Bazuar në të dhënat paraprake, ndaj këngëtarit rëndon dyshimi për veprën penale "Vepra të turpshme". Ajo parashikohet në nenin 108 të Kodit Penal.