Çarçafët e bardhë nuk janë më zgjedhja e parë: Këto ngjyra sjellin ngrohtësi dhe pamje luksoze në dhomën e gjumit

Çarçafët e bardhë po lënë vendin për ngjyrat e ngrohta që e bëjnë dhomën e gjumit më luksoze

Shtrati nuk vishet më vetëm me të bardha. Nuancat e natyrës dhe loja me materiale të ndryshme po sjellin një frymë të re në arredimin e dhomës së gjumit.

Kjo hapësirë duhet të ofrojë qetësi. Aty shkëputemi nga ritmi i ditës dhe kërkojmë rehati. Pikërisht për këtë arsye detajet kanë marrë më shumë peshë. Veçanërisht zgjedhja e çarçafëve dhe mbulesave përcakton ndjesinë që krijon dhoma.

Për një kohë të gjatë e bardha dominoi gjithçka. Ajo shihej si shenjë pastërtie dhe rregulli. Ishte edhe standardi i hoteleve. Sot peizazhi po ndryshon. Në tendencat e fundit avancojnë tonet më të ngrohta e më të buta, me frymëzim të qartë nga natyra.

Në krye të preferencave renditen jeshilja e sherbelës dhe ulliri. Pranë tyre vijnë argjila dhe paleta e tokës. Këto nuanca njihen për atmosferën mikpritëse që krijojnë. Gjithashtu shkojnë natyrshëm me mobiliet prej druri, fibrat natyrale dhe muret në tone neutrale.

Trendi nuk prek vetëm ngjyrën. Ka ndryshuar edhe logjika e shtrimit të krevatit. Nuk kërkohet më që çdo element të jetë pjesë e një kompleti të vetëm. Çarçafët, këllëfët dhe mbulesa mund të mos jenë identikë.

Tonet e gjelbra me referencë natyrore funksionojnë shumë mirë në dhomën e gjumit. Sherbela e çelët sjell qetësi dhe lehtësi vizuale. Ulliri, nga ana tjetër, shton thellësi dhe ngrohtësi.

Të dyja shkojnë bukur me drurin. Harmonizohen edhe me muret bezhë dhe aksesorët prej liri, bambuje apo materialeve të tjera natyrale.

Nëse kërkoni një ambient më të ngrohtë, mund të shikoni te terakota. Edhe nuancat e ndryshkut të lehtë dhe kafja e butë janë alternativa të mira. Veçanërisht kur shoqërohen me kremin, ato krijojnë një pamje komode.

Një avantazh i këtyre ngjyrave është përshtatja. Ato integrohen pa vështirësi në stile të ndryshme. Nga minimalizmi i pastër deri te fryma rustike.

Ideja e kompleteve ku gjithçka duhet të përputhet saktë po perëndon. Dikur konsiderohej rregull i pashkruar që çarçafi, jastëkët dhe mbulesa e jorganit të kishin të njëjtën ngjyrë dhe të njëjtin motiv.

Qasja bashkëkohore fton për kombinime. Nuanca të ndryshme dhe motive që bashkëbisedojnë mes tyre janë më të kërkuara sot.

Një shembull i thjeshtë funksionon gjithmonë. Një mbulesë jorgani njëngjyrëshe gjallërohet nga jastëkë me vija apo me lule të imta.

Për dashamirësit e thjeshtësisë, funksionon edhe një tjetër formulë. Mjafton të zgjidhni dy apo tre tone brenda së njëjtës familje. Bezhë, rërë dhe kafe janë një treshe e sigurt.

Çelësi nuk është kopjimi perfekt. Harmonia ka më shumë rëndësi. Ndryshimet e vogla e bëjnë shtratin të duket më natyral. Dhe më interesant në të njëjtën kohë.

Përtej ngjyrës, peshë ka edhe tekstura. Materiali përcakton jo vetëm pamjen, por edhe ndjesinë.

Pambuku dhe liri mbeten zgjedhje praktike për çdo ditë. Një plaid i butë apo disa jastëkë dekorativë shtojnë menjëherë rehatinë.

Në muajt e ftohtë efekti bëhet edhe më i dukshëm. Çarçafët e lëmuar së bashku me një mbulesë më të trashë e bëjnë krevatin më të ngrohtë. Pamja bëhet më ftuese.

Nuk ka nevojë të rinovoni gjithçka. Ndonjëherë mjafton një shtesë e vetme. Një mbulesë në ton tjetër apo këllëfë me reliev të veçantë ndryshojnë të gjithë atmosferën.

Si të zgjidhni ngjyrën e duhur?

Hapi i parë është të vëzhgoni dhomën. Shihni cilat tone dominojnë tashmë aty.

Nëse muret janë të çelëta dhe mobiliet prej druri, ulliri apo argjila krijojnë kontrast të këndshëm. Pa rënduar hapësirën.

Për dhomat e vogla këshillohen nuancat e hapura. Bezhë e çelët, kremi dhe sherbelja ruajnë ndjesinë e hapësirës. Ndërsa tonet e errëta ruhen më mirë për detaje të vogla.

Në fund, rehatia mbetet kriteri kryesor. Çarçafët duhet të jenë të këndshëm në prekje dhe të thjeshtë për t'u mirëmbajtur.

Dashuria për të bardhën nuk ka pse të mohohet. Edhe e bardha qëndron moderne. Sidomos kur shoqërohet me mbulesa në nuanca të ngrohta dhe thekse me frymëzim natyror.