Braçe sulmon gjyqtarët pas kallëzimit të Malajt në SPAK: Vetëgjyqësi, po kalojnë në harbim

**Titulli: Braçe sulmon gjyqtarët pas kallëzimit të Malajt në SPAK: Vetëgjyqësi, po kalojnë në harbim**

Kallëzimi në SPAK nga ana e ministrit Petrit Malaj lidhur me çështjen e pagave të magjistratëve është një akt vetëgjyqësie. Kështu e komenton deputeti i PS-së, Erion Braçe, në një intervistë për "Frontline" në Report TV. Ai ripohon argumentin e mbrojtur deri më tani nga qeveria, duke u mbështetur te vendimi i Gjykatës Kushtetuese: përcaktimi i pagave është kompetencë e Kuvendit.

Braçe vijon me kritikën, duke theksuar se gjyqtarët duhet të kuptojnë se buxheti i shtetit nuk është pronë e ministrit. Detyra e Ministrisë së Financave, sipas tij, është ruajtja e integritetit të buxhetit, jo plotësimi i kërkesave individuale.

“Serioziteti i shtetit është A-ja. Në këtë rast, serioziteti i shtetit është në nivele minimale. Gjyqtarët duhet të fillojnë të adoptojnë një sjellje tjetër, prej nëpunësish publikë të shtetit, jo njerëzish që kanë në dorë fatin e gjithkujt. Të kallëzosh ministrin e Financave kur Gjykata Kushtetuese ngarkon Kuvendin me përcaktimin e rrogave, minimalisht është vetëgjyqësi. Siç sillen ata atje në rrugë, të sillet tani niveli më i lartë i gjyqësorit në Shqipëri. Bëri mirë Sadushi që bëri mbledhjen e gjyqtarëve sepse e futi në hulli ligjore e kushtetuese çështjen, por ndërkohë një pjesë tjetër kishte shkuar në SPAK të kallëzonte ministrin e Financave. Ministri i Financave është aty si roja i harbimit fiskal. Duhet të rrijë atje për të menaxhuar rregullat e ligjit të sistemit buxhetor të Shqipërisë, jo të tekave. Nuk është buxheti i shtetit për këtë gjë dhe këta duhet të kuptojnë që ato janë para të krijuara nga taksat e qytetarëve, s’janë të ministrit. Në këtë çështje këta duhet të pozicionohen një herë e mirë dhe për fat, e ka vendosur Gjykata Kushtetuese. Unë kam rezerva të mëdha për logjikën që ka përdorur Gjykata Kushtetuese, por si vendim duhet ta zbatoj. Në këtë pikë, po flas për seriozitetin e parlamentit”, shprehet Braçe.

Nënvizohet gjithashtu kritika ndaj parlamentit për mungesë serioziteti, pikërisht për shkak të dështimit në marrjen e një vendimi brenda afatit të përcaktuar nga Kushtetuesja. Pas kalimit të këtij afati, KLGJ dhe KLP vendosën që nga 1 gushti paga referuese të llogaritej mbi 222 mijë e 425 lekë, plus 14 mijë lekë shtesë për kualifikimin.

Braçe e konsideron logjikën e institucioneve të drejtësisë për përllogaritjen e pagës si të shkëputur nga realiteti dhe një kërcënim për qëndrueshmërinë fiskale.

“Ajo që di është se ne duhet të kishim marrë vendim brenda datës 31 korrik. Duhet t’i kishte dhënë zgjidhje të miratonte koeficientin dhe rrogat. Sjellja e tyre nuk është ajo që keni parë në media. Jam interesuar dje pranë Ministrisë së Financave, por niveli administrativ i gjykatave e prokurorive pse duhet përfshirë? Kanë çuar listat bashkë me ta në Thesarin e Shtetit. Është synuar, është diskutuar me ta që ndajeni pjesën administrative, kanë refuzuar të ndajnë borderotë. Në fund fare, këta nuk mund të caktojnë rrogat e tyre. Gjykata Kushtetuese nuk thotë që gjyqtarët e prokurorët të caktojnë rrogat. Këta duhet të kuptojnë që buxheti i shtetit ka limite. Nuk mund të kalojnë në harbim. Nëse shkojnë në koeficientin dhe formulën e KLGJ e KLP, duhet t’u japim gjyqtarëve e prokurorëve menjëherë 30-50 mln lekë. Çfarë është kjo? Mendojnë këta njerëz apo nuk mendojnë? Unë jam ekonomist dhe para atyre më intereson qëndrueshmëria fiskale e këtij vendi. Parlamenti ka detyrë të miratojë sa më parë ligjin dhe të zbatojë vendimin e Gjykatës Kushtetuese”, tha Braçe.

Nga ana tjetër, qeveria ngulmon se vendimi i Gjykatës Kushtetuese do të zbatohet duke pasur parasysh qëndrueshmërinë dhe mundësitë e buxhetit të shtetit.