Berisha-Peleshit: Kur të thashë se do të zëvendësojnë, u solle si tuhaf! Tani lexo përgjimet

Arrestimi i drejtueses së SHISH-it, Vlora Hyseni, ka ndezur debate të ashpra në Kuvend. Ajo akuzohet se ka ndihmuar Ergys Agasin gjatë arratisë dhe i ka vënë në dispozicion informacione sekrete. Çështja u diskutua gjatë seancës plenare, pas publikimit në media të mesazheve mes Hysenit dhe Agasit.

Duke iu referuar këtyre komunikimeve, kryetari i Partisë Demokratike Sali Berisha iu drejtua kryetarit të Kuvendit. Ai tha se e kishte paralajmëruar disa ditë më parë për një plan për ta zëvendësuar me një drejtues tjetër. Reagimi i atëherë ishte mosbesues, sipas tij.

"Kur unë deklarova para pesë gjashtë ditësh se kanë parashikuar të të zëvendësojnë me atë tjetrin, ti u solle si tuhaf. Po bën intriga Sali. Lexoje pak atë. Lexoje pak se çfarë thonë", deklaroi Berisha.

Në fjalën e mbajtur në foltore, Berisha e quajti ngjarjen rekord të zi për vendin. Sipas tij, rasti ka dëmtuar besimin e partnerëve ndërkombëtarë te shërbimi inteligjent shqiptar. Ai akuzoi ish-drejtuesen e SHISH-it se ka përdorur mjetet e institucionit në funksion të grupeve kriminale.

"A e kuptoni ju se çfarë do të thotë për komunitetet inteligjente të vendeve partnere kjo? Nuk ka rekord më të zi se ky! Shefi i shërbimit informativ di çdo sekret, dhe aq sa di kryeministri dhe presidenti, i di prej atij ose asaj. Ajo, siç rezulton, e ka pajisur organizatën kriminale të Ergys Agasit me mjetet më të sofistikuara të regjimit. Të gjithë jeni në dosje të filmuar. Ulsi, të ka dalë shumë herë emri. Po nuk je vetëm ti. Nuk je jo, je me plot të tjerë", theksoi Berisha.

Ai shtoi se zyra e krijuar prej saj ishte pajisur me aparatura shumë të avancuara. Mjetet ishin blerë me paratë e taksapaguesve shqiptarë ose ishin dhuratë e partnerëve për sigurinë kombëtare. Destinuar për vëzhgimin e armiqve, ato u përdorën ndryshe. Sipas Berishës, u shfrytëzuan për qëllime të ulëta të përplasjeve mes klaneve. "Janë përdorur që të gjitha në funksion të Troplinëve, Çelëve dhe bandave të tjera", tha ai.