Berisha ndryshon në moment të fundit vendin e takimit në SHBA, paralajmërohen protesta në aktivitetin e kreut të PD (VIDEO)

Kreu i Partisë Demokratike, Sali Berisha, ka ndryshuar minutën e fundit vendin e takimit të parashikuar në Shtetet e Bashkuara të Amerikës. Vendimi u mor pas shqetësimeve për mundësinë e një proteste kundër tij gjatë aktivitetit me demokratët në Nju Xhersi.

Fillimisht ishte planifikuar që mbledhja të zhvillohej në godinën e "Bergen Performing Arts Center". Mirëpo, sipas organizatorit të protestës, Jurgen Boduri, ky lokacion është braktisur dhe takimi është zhvendosur në një tjetër.

Boduri, i cili jeton në SHBA, e bëri të ditur ndryshimin përmes një video-mesazhi. "Sapo kemi marrë informacionin se është ndryshuar vendndodhja e takimit të Sali Berishës me militantët dhe simpatizantët në Nju Xhersi. Nuk e di pse ka ndodhur ky ndryshim në momentin e fundit, dy ditë para takimit. Ndoshta frika e një proteste të madhe, e një organizimi që do të tregojë dhe nxjerrë në pah që Berisha nuk është i mirëpritur dhe është ‘non grata’ nga shqiptarët e Amerikës. Pavarësisht se Amerika mund t’ia ketë hequr, gjë që akoma nuk është deklaruar 100%," u shpreh ai.

Për Berishën, situata paraqitet e vështirë. Organizatori i protestës theksoi se sapo të marrë vesh adresën e re, do ta njoftojë menjëherë publikun. "Por këto detaje të takimit, që janë ndryshuar dy ditë para eventit, po mbahen sekrete. Patjetër që ne kemi njerëz të brendshëm për të mësuar se ku do të mbahet takimi. Sa më shpejt ta kemi këtë informacion, do ta shpërndajmë, që të gjithë ta marrin vesh dhe të mblidhemi që ta presim Sali Berishën ashtu siç e meriton," tha Boduri.

Vlen të theksohet se Jurgen Boduri dhe individët që ai etiketon në rrjetet sociale për këtë protestë, janë të njohur si mbështetës të lëvizjes së protestuesve të quajtur "flamingo" në bulevardin e Tiranës. Ai shkon deri aty sa pretendon se ka burime të brendshme brenda grupit organizator të takimit të Berishës në Nju Xhersi.

Ndërkohë, prania e Berishës në Amerikë nënvizon një dinamikë të re. “Tashmë, Berishës shuplaka nuk po i vjen më nga SHBA-ja. Ata ia dhanë vizën. Vizën po ia heqin këtë herë “flamingot” që mbështeti në Tiranë kundër SHBA-së,” komentohet në diskursin politik.