Berisha kthehet nga SHBA, flet për takimin me diasporën: I gjeta më të fortë, u ktheva 35 vite pas

Kreu i Partisë Demokratike, Sali Berisha, dha sot një deklaratë për mediat në Tiranë, menjëherë pas kthimit nga Shtetet e Bashkuara të Amerikës.

"Ky është udhëtimi më i rëndësishëm e më ripërtëritës i jetës time. Së pari, një përshëndetje e ngrohtë për ju dhe për të gjithë shqiptarët. Po kthehem nga një rrugëtim që besoj e keni ndjekur me vëmendje. Mund t'ju them vetëm se ky ishte udhëtimi më i mirë. Quajeni ripërtëritje, sepse ajo ndodhi atje", u shpreh Berisha.

Ai u ndal më pas në detaje rreth takimeve të zhvilluara me komunitetin shqiptar në SHBA.

"Takimet me bashkëatdhetarët ishin jashtëzakonisht frymëzuese. U ndjeva sikur u ktheva 35 vite më parë, bashkë me miqtë e mi. Atëherë shkuam për të marrë mbështetjen e tyre dhe të Amerikës për të rrëzuar komunizmin. Këtë herë, ndërsa luftojmë kundër një regjimi që mbahet nga droga dhe dogma, Diaspora shfaqet më e fortë se kurrë. E gjeta plot 30 herë më të fuqishme se më parë...", shtoi ai.