Berisha i paftuar në pritjen për ambasadorin e ri të SHBA, analisti nxjerr prapaskenat: Mori vizën me miliona dollarë, por vijon të jetë “non grata”!

Analisti Ergys Mërtiri e ka lidhur dominimin aktual të mazhorancës me krizën brenda opozitës. Sipas tij, PD dhe kryetari i saj Sali Berisha mbajnë peshën kryesore që Edi Rama dhe Partia Socialiste qeverisin sot me 83 mandate në Kuvend.

Në një intervistë për Report Tv, Mërtiri u ndal edhe te tryeza e organizuar një ditë më parë nga Berisha me aleatët historikë të demokratëve. Ai e quajti takimin pa vlerë politike.

Për analistin, në atë tryezë u mblodhën drejtues të moshuar partish që nuk largohen nga karriget. Qëndrimi i tyre në krye të forcave opozitare, tha ai, lidhet vetëm me interesa personale.

“Rama tani ka 83 mandate për shkak të opozitës. Se bëri një kod elektoral që i dha mandate qyl Edi Ramës që ai tani bën çfarë të dojë. Atëherë për çfarë ka gojë opozita të flasë më tani? Tryeza që bëri opozita, ishte tryezë qesharake. Njëri thotë ‘të marrim në dorë protestën’. A thua se protesta është aty për shkak të bamirësisë së Berishës për të lejuar një protestë. Problemi më i madh është se opozita është e pareformuar. Këtë nuk e thonë. Tryeza e djeshme ishte një tryezë pleqsh. Ashtu si Berisha, edhe ata të tjerët nuk ikin nga partitë e tyre. Ajo ishte protesta e opozitës vegjetative që fle gjumë aty dhe ushqehet me thërmijat që i jep PD. Opozita e vërtetë është në shesh”, u shpreh Mërtiri.

Gjatë bisedës ai e ashpersoi gjuhën ndaj kryedemokratit. Berishën e cilësoi si një politikan mbi 80 vjeç që po bllokon të ardhmen e opozitës. Hyrja e PD-së në zgjedhje me të në krye, sipas Mërtirit, nuk ofron alternativë për qytetarët.

“Mund të jetë gara pa garë”, ishte mesazhi i tij. Ai shtoi se qytetarët që kanë dalë në shesh kërkojnë largimin e të dy poleve kryesore të politikës.

“Njerëzit në shesh kanë dalë për të rrëzuar Ramën dhe Berishën. Berisha thotë ‘nxirrni ju kandidatë kundër Ramës që të vij unë’. Protesta mund të nxjerrë kandidatë kundër Ramës dhe Berishës. Plaku 80 e ca vjeç po mban peng opozitën. Vajtja në zgjedhje në këto kushte, është të shkosh në zgjedhje pa alternativë. Njerëzit janë të vrarë sepse nuk kanë më çfarë të zgjedhin”, theksoi analisti.

Në fund Mërtiri komentoi edhe mungesën e Berishës në pritjen e organizuar nga Ambasada e Shteteve të Bashkuara në Tiranë për ambasadorin e ri Eric Wendt. Sipas tij, ftesa nuk ka ardhur fare.

Arsyeja, tha ai, është statusi i pandryshuar i Berishës ndaj Uashingtonit. Ai mbetet ende i shpallur “non grata”.

“Unë e kam thënë që kur Berisha shkoi në Amerikë, që kjo nuk është heqje e ‘non gratës’. Kjo është thjeshtë arritje e Berishës për të marrë një vizë përmes miliona dollarëve. Por kjo nuk është heqje e non gratës, sepse heqja e non gratës do reflektohej në faqen zyrtare të DASH dhe do pasonte me shkrirjen e akujve politikë mes PD dhe politikës amerikane. Fakti që as ambasadori nuk e thërret as në gëzimin e vet, tregon që Berisha vijon t’i ketë marrëdhëniet e ngrira me SHBA-në. Berisha vijon të jetë non grata në SHBA, Britani, por mesaduket edhe në Gjermani, pasi as ambasadori gjerman nuk e takoi”, përfundoi Mërtiri.