Begaj ndjek stërvitjen ushtarake “Mburoja e Arbrit 2026”: Aktorët keqdashës mund të cenojnë paqen në rajon, duhet të jemi të përgatitur!

**Begaj ndjek ushtrimin “Mburoja e Arbrit 2026”: aktorët keqdashës mund të rrezikojnë paqen rajonale, duhet të jemi të përgatitur!**

Presidenti Bajram Begaj ndoqi nga afër përfundimin e stërvitjes së Grup-Batalionit të Këmbësorisë së Lehtë “Mburoja e Arbrit 2026” në Bizë, aktivitet ky që u certifikua “I aftë për mision” sipas standardeve të NATO-s.

Gjatë fjalës së nderit në ceremoni, ai vlerësoi certifikimin si një dëshmi të përparimit të Forcave të Armatosura, gatishmërisë së lartë, disiplinës dhe profesionalizmit, duke thënë se ky është një standard që duhet ruajtur. “Sot, këtu në Bizë, ju dëshmuat jo vetëm gatishmëri të lartë taktike, por edhe rezistencë e karakter të fortë ushtarak. Ju treguat aftësinë për të planifikuar, për të koordinuar dhe për të vepruar në një mjedis kompleks operacional”, deklaroi ai, duke shtuar se gatishmëria ushtarake ndërtohet çdo ditë përmes stërvitjes dhe profesionalizmit.

Si Komandant i Përgjithshëm i Forcave të Armatosura, kreu i shtetit theksoi se në kontekstin aktual të sfidave të sigurisë, përfshirë luftën në Ukrainë, tensionet në Lindjen e Mesme, kërcënimet hibride, sulmet kibernetike dhe dezinformimin, rreziqet prekin edhe rajonin tonë, duke bërë të domosdoshëm forcimin e mbrojtjes për të garantuar sigurinë kombëtare.

Ai shtoi se “Ringjallja e nacionalizmit, retorika përçarëse, tensionet etnike dhe përpjekjet e aktorëve keqdashës për të shfrytëzuar dobësitë tona mund të cenojnë paqen dhe stabilitetin e rajonit. Pikërisht për këtë arsye, ne duhet të investojmë në siguri para se pasiguria të trokasë në dyert tona. Paqja nuk ruhet me pasivitet apo vetëm me deklarata. Ajo mbrohet me gatishmëri, stërvitje, me aleanca të qëndrueshme dhe me një Forcë të Armatosur të mirëpajisur dhe të përgatitur”, deklaroi Presidenti Begaj.

Ai kushtoi vëmendje të veçantë partneritetit me Shtetet e Bashkuara dhe NATO-n, duke vënë në dukje se Forcat e Armatosura janë të afta të mbështesin aleatët ku të duhet. “Të jesh i vlerësuar ‘I aftë për mision’ nuk është një titull që mbetet në arkivat e një stërvitjeje. Është aftësia reale për t’u dislokuar dhe për të vepruar me efikasitet operacional kudo dhe kurdo që kërkohet, përkrah aleatëve tanë”, tha ai.

Kretihet shtetit vuri në dukje gjithashtu investimet në industrinë e mbrojtjes, për modernizimin e strukturave, zhvillimin e kapaciteteve ushtarake, infrastrukturën dhe garantimin e sigurisë kombëtare. “Arritjet e Forcave tona të Armatosura nuk do të ishin të mundura pa mbështetjen e palëkundur të aleatëve tanë në NATO. Dua të vlerësoj në mënyrë të veçantë partneritetin strategjik me Shtetet e Bashkuara të Amerikës. Mbështetja amerikane – theksoi Presidenti Begaj – ka qenë e vazhdueshme dhe përcaktuese për rritjen e kapaciteteve tona mbrojtëse”.

Me këtë rast, Presidenti Begaj përcolli një mesazh të veçantë mirënjohjeje Gardës Kombëtare të New Jersey-t, përmes Komandantes së saj, Gjeneral Brigade Yvonne L. Mays, e cila ishte e pranishme në ceremoni.

Në fund, kreu i shtetit siguroi ushtarakët se si President i Republikës dhe si Komandant i Përgjithshëm i Forcave të Armatosura ai do të mbështesë çdo nismë që përmirëson kushtet e shërbimit, karrierën, mirëqenien e ushtarakëve dhe familjeve të tyre.