ABC24.al është gazeta dixhitale shqiptare që ofron lajme të besueshme, analiza të thelluara dhe reportazhe ekskluzive 24 orë në ditë.
Në ditën kur Partia Socialiste mbledh Asamblenë e Tiranës për të diskutuar përgatitjet për zgjedhjet vendore të vitit 2027, Erion

Në të njëjtën ditë kur Partia Socialiste zhvilloi Asamblenë e Tiranës për të diskutuar përgatitjet e zgjedhjeve vendore të 2027-ës, nga burgu ka ardhur një mesazh i Erion Veliajt drejtuar socialistëve të kryeqytetit.
Ish-kryebashkiaku e ngre pyetjen për identitetin e sotëm të PS-së në Tiranë. Sipas tij, socialistët po zëvendësohen nga ministra dhe drejtues institucionesh, të cilët po u marrin hapësirën përmes privilegjeve.
Në mesazhin e tij, Veliaj kujton se prej vitit 2015 është ndërtuar bashkë një organizatë që besonte te puna, progresi dhe qyteti. “Fitoret tona nuk na i dhanë as bandat, as krimi dhe as të fortët,” shkruan ai, duke shtuar se ato u fituan me djersën e socialistëve dhe qytetarinë e Tiranës.
Më pas vjen pyetja: “Po a jemi ende ajo parti?”
Veliaj i fton socialistët të shikojnë shokun pranë vetes. A është ai ende socialisti me të cilin u ndanë betejat dhe fitoret, apo vendin e tij e kanë zënë “ministruca e drejtoruca, që pushtojnë territore me privilegje, në vend që të pushtojnë zemrat e qytetarëve”?
Ai shprehet i pikëlluar për një parti ku drejtuesi u hakërrehet socialistëve që e ngritën në krye. Sipas tij, mijëra vota dhe vite sakrificash fshihen me një klithmë të vetme, ndërsa besnikëria e verbër ndaj tij vlen më shumë se ajo ndaj parimeve.
“Ne ndërtuam një parti zemrash, jo një hordhi privilegjesh!” thekson ai në mesazh.
Veliaj pranon se sot i ka duart e lidhura, por jo kujtesën, bindjet dhe përgjegjësinë për atë që u ndërtua bashkë. Ai e përshkruan Tiranën si qytetin e rinisë, kulturës dhe optimizmit, si dhe zemrën e tyre të madhe.
Apeli për socialistët është të ruajnë qytetarinë dhe djersën e deritanishme. Historia e tyre, shkruan ai, nuk duhet të zëvendësohet nga pushteti i pamerituar.
Mesazhi mbyllet me firmën: “Me mall, respekt, përulje dhe mirënjohje”, nënshkruar nga “Miku dhe shoku juaj, Socialisti me duar të lidhura, Erion Veliaj”.
Shkruar nga
Redaksia ABC24
Artikujt e firmosur "Redaksia ABC24" përgatiten nga desku qendror i lajmeve — ekipi që mbulon lajmet 24 orë në 7 ditë. Sinjalet e lexuesve, lajmet e minutës së fundit dhe kërkesat për korrigjim kalojnë të gjitha nga kjo tryezë redaksie, ku çdo tekst rishikohet kolektivisht para publikimit.
Diskutimi
Komentet miratohen nga redaksia para se të shfaqen.