“Arresti me burg” në fokus, ndryshon Kodi Penal, Karanxha: Paraburgimi është tepruar në Shqipëri

Drafti për Kodin e Procedurës Penale ka qenë në qendër të debatit në Report Tv. Në studion e emisionit “Repolitix”, me gazetarin Denis Minga, u diskutuan ndryshimet e propozuara në këtë Kod. Vëmendja u ndal te risitë për masat e paraburgimit dhe te garancitë e personit nën hetim përballë gabimeve apo abuzimeve të mundshme shtetërore.

Ish-prokurori Ervin Karanxha i vlerësoi ndërhyrjet si hap pozitiv. Sipas tij, masa e sigurisë “arrest me burg” është aplikuar përtej nevojës në praktikën shqiptare. Kjo qasje, tha ai, ka krijuar një problem të vazhdueshëm.

Karanxha kujtoi se Shqipëria është vënë në lupë për këtë fenomen. Çështja e përdorimit të zgjeruar të paraburgimit është diskutuar në Këshillin e Europës. Ajo është trajtuar edhe në organizma të tjerë ndërkombëtarë, përfshirë Gjykatën e Strasburgut.

Sipas ish-prokurorit, ndërhyrjet e reja forcojnë pozitat e mbrojtjes. Roli i avokatit bëhet më i fortë në raport me prokurorin. Kjo balancon më mirë palët në proces.

“Shikojmë një zhvillim pozitiv, sepse siç e kemi diskutuar shpesh, në parim flitet që masa e sigurimit ‘arrest me burg’ në Shqipëri është tepruar. Shqipëria është bërë objekt diskutimi në Këshillin e Europës dhe shumë organe të tjera, përfshi edhe Gjykatën e Strasburgut. Tani po bëhet një ndryshim dhe e quajmë pozitiv në parim. Ka edhe gjëra që duhen parë. Diçka pozitive është që edhe avokatët mund të bëjnë hetime. Me kodin e sotëm nuk bën dot veprime. Ti i bën kërkesë organit procedues dhe në 99% të rasteve është refuzim kërkese. Me ndryshimet e fundit, përshembull në rastin e Agasit, mund të paraqesin dëshmitarë të tjerë. Pra avokati paraqet prova”, tha mes të tjerash ish-prokurori Karanxha.

Edhe avokati Përparim Caca i cilësoi ndryshimet si pozitive. Ai megjithatë nënvizoi një rezervë. Sipas tij, do të ishte më e udhës një Kod i ri i Procedurës Penale, jo vetëm arnime të pjesshme.

Caca vlerësoi se ndërhyrjet godasin një kulturë të konsoliduar abuzive në ushtrimin e procedimit penal. Ai u ndal te disa prej risive kyçe. Ato, tha ai, favorizojnë të drejtat e të pandehurit në raport me strukturat hetimore.

“Me ndryshimet e kodit të procedurës, Prokuroria, hetuesit, OPGJ-të, do të duhet të vrapojnë pak. Në të gjitha aspektet, qoftë edhe në aspektin procedurial. Sepse ato ndryshime, unë do të kisha qenë për një kod të ri të procedurës penale, jo me këto arnimet. Përsa i përket këtij fakti unë mendoj se këto ndryshime i japin një goditje një kulture abuzive të mënyrës sesi kryhej një procedim penal. Kemi parë shumë raste që ka të pandehur që në sallën e gjyqit deklarojnë se e kanë dhënë një dëshmi në kushtet realisht të presionit. Tashmë jo. Do jetë audio-vizive. Është një moment shumë i rëndësishëm procedurial. Kjo është një risi pozitive. Pse them i jep fund një praktike abuzive. Sepse gjithmonë personi që merret lihet në një dhomë në të gjitha komisariatet e vendit. Në atë dhomë ka të drejtë organi, që në rastin konkret Policia, që të bëjnë një përgjim ambiental. Nëse ata kryejnë biseda me njëri-tjetrin, në padijeni të plotë, nëse dilte nga këto biseda diçka kompromentuese, lajmërohej prokurori dhe bëhej sikur ishte marrë më herët leja për përgjim. Tani duhet të marrësh leje në Gjykatë për përgjimin”, tha mes të tjerash Caca.