Ariu sulmon një familje pranë kryeqytetit të Mongolisë, një burrë vdes dhe një grua lëndohet rëndë

Ariu sulmon banesën pranë Ulaanbaatarit, një i vdekur dhe një e plagosur rëndë

Një burrë në të 40-at humbi jetën dhe një grua u plagos rëndë pasi u sulmuan nga një ari brenda banesës së tyre pranë Ulaanbaatarit.

Ngjarja ndodhi natën e së mërkurës. Sulmi u shënua në distriktin Bayanzurkh, brenda një ger-i, çadra tradicionale që përdoret ende gjerësisht nga familjet nomade në Mongoli.

Burri nuk mundi t'u mbijetojë plagëve të marra. Gruaja, rreth 50 vjeçe, arriti të dalë nga çadra dhe kërkoi ndihmë te fqinjët.

Ajo u transportua menjëherë në spital. Gjendja e saj mbetet e rëndë, tha zyrtari i qytetit Munkhbayar M.

Autoritetet kanë nisur kërkimet për të gjetur kafshën. Ekipet e rojeve po patrullojnë zonën pa ndërprerje.

Banorëve u është kërkuar kujdes i shtuar dhe raportim i menjëhershëm për çdo shfaqje të ariut.

Rasti vjen në një periudhë kur takimet me arinj pranë zonave të banuara po shtohen ndjeshëm në Mongoli. Ekspertët dhe autoritetet i lidhin këto shfaqje edhe me ndryshimet klimatike dhe mungesën e ushqimit, faktorë që i shtyjnë kafshët drejt vendbanimeve.

Vetëm këtë vit janë regjistruar 24 raste të pranisë së arinjve rreth Ulaanbaatarit. Shifra është shumë më e lartë se në vitin 2018, kur u raportuan vetëm dy raste, sipas agjencisë AFP.

Në javët e fundit në rrjetet sociale mongole janë shpërndarë video të ndryshme. Pamjet pretendohet se tregojnë arinj duke hyrë në ger-ë, duke i dëmtuar ato dhe duke sulmuar bagëti. Ato dëshmojnë shtimin e kontakteve mes njerëzve dhe kafshëve të egra në disa rajone.

Ndërkohë autoritetet kanë dhënë leje për gjuetinë e arinjve në tetë provinca. Paralelisht po punohet për sigurimin e armëve me shigjeta qetësuese për rojet që operojnë në zonat rurale.

Mongolia ruan ende një pjesë të madhe të popullsisë me jetë nomade. Por komunitetet e qëndrueshme po zgjerohen. Gjithnjë e më shumë njerëz po vendosen në Ulaanbaatar dhe në qytetet e tjera, çka rrit mundësinë e përballjeve me faunën e egër. /ABC24.AL/