Anglia shkatërron Kroacinë, 7 gola në 90 minuta, Kane e Saka shënojnë dopietë!

Anglia ka dhënë një shfaqje force në fushën e Kroacisë për ndeshjen e grupeve të Ligës së Kombeve. Përballë një kombëtareje ballkanase që ka shkëlqyer në Botërorët e fundit dhe është kthyer në një emër të konsoliduar në futbollin ndërkombëtar, anglezët fituan thellë 0-7.

Sfida u zhbllokua shumë shpejt. U deshën vetëm tetë minuta që Harry Kane të kalonte miqtë në avantazh. Rezultati u thellua ende pa u mbyllur pjesa e parë. Jude Bellingham, Anthony Gordon dhe Bukayo Saka gjetën gjithashtu rrugën e rrjetës para pushimit.

Pas kthimit nga dhomat e zhveshjes ritmi nuk ra. Kane dhe Saka shënuan edhe një herë, duke kompletuar dopietën personale. Në fund Rogers vulosi gjithçka. Goli i tij në minutat e fundit fiksoi shifrat përfundimtare në 0-7.

Ky sukses vjen si reagim i Anglisë pas humbjes në ndeshjen e parë të grupit. Kroacia, nga ana tjetër, duket se e nënvlerësoi kundërshtarin. Me këto tri pikë anglezët ngjiten në vendin e dytë me gjashtë pikë, tre më shumë se kroatët. Në mbrëmje Spanja përballet me Republikën Çeke për të njëjtin grup.