Amina Nuraj, kandidatja e parë shqiptare nga Sanxhaku për deputete në Parlamentin e Serbisë

Amina Nuraj nga Sanxhaku kandidate e parë shqiptare për Parlamentin e Serbisë

Amina Nuraj nga Pazari i Ri do të garojë për një mandat deputeteje në Parlamentin e Serbisë në votimet e 25 tetorit. Ajo është përfshirë në listën e përbashkët me emrin “Koalicioni Shqiptar”, që kandidon në emër të komunitetit shqiptar.

Prania e saj konsiderohet risi. Deri tani, kjo listë është ndërtuar kryesisht me emra nga Presheva, Bujanoci dhe Medvegja. Hyrja e një kandidateje nga Sanxhaku sjell një profil ndryshe në këtë garë.

Formacioni garues numëron gjithsej 10 emra, të ndarë në mënyrë të barabartë mes grave dhe burrave. Në fletën e votimit mban numrin 17.

Nuraj drejton Zyrën e Këshillit Kombëtar Shqiptar në Pazarin e Ri. Prej vitesh ajo punon për forcimin e gjuhës, kulturës dhe identitetit shqiptar në Sanxhak, raporton ABC24.AL.

Sipas saj, kandidimi është shans për të ngritur në institucionet serbe problematikat e shqiptarëve të Sanxhakut, Luginës së Preshevës dhe zonave të tjera ku jeton ky komunitet. Mesazhi që ka zgjedhur për fushatën është: “Nga Sanxhaku në Parlamentin e Serbisë, me zërin e shqiptarëve”.

Ajo e lidh këtë vendim me një angazhim rreth 14-vjeçar në mbrojtje të komunitetit. Në qendër të punës së saj kanë qenë ruajtja e gjuhës amtare, identitetit dhe të drejtave të shqiptarëve.

Aktivistë shqiptarë, mes tyre edhe Nuraj, kanë ngritur shqetësimin se një pjesë e popullsisë me origjinë shqiptare është asimiluar me kalimin e dekadave. Sot, shumë prej tyre identifikohen kryesisht si boshnjakë.

Vitet e fundit, përfaqësues të komunitetit në Sanxhak kanë shtuar nismat për të rigjallëruar trashëgiminë, gjuhën dhe traditat shqiptare. Janë ndërmarrë edhe projekte konkrete për t’u mësuar shqipen fëmijëve dhe të rinjve të zonës.

Nuraj ka pasur rol aktiv në këto përpjekje. Ajo është takuar gjithashtu me përfaqësues të institucioneve të Kosovës për të diskutuar gjendjen dhe të drejtat e shqiptarëve në Sanxhak.

Me kandidimin e 25 tetorit, ajo synon të çojë zërin e Sanxhakut në legjislativin serb, krah përfaqësuesve nga Presheva, Bujanoci dhe Medvegja. /ABC24.AL/