“Ambicia dhe vendosmëria jonë është e qartë”- Ministri Hoxha takohet me ministrat e BE për Çështjet Evropiane: Shqipëria ka hyrë në fazë vendimtare!

Ministri për Evropën dhe Punët e Jashtme, Ferit Hoxha, ishte i pranishëm në takimin informal të ministrave përgjegjës për çështjet evropiane, që u organizua në Dublin nën kryesimin e Presidencës irlandeze të Këshillit të Bashkimit Evropian.

Gjatë sesionit kushtuar zgjerimit, mbështetjes së reformave dhe përmirësimit të kapaciteteve administrative, Hoxha ndau me kolegët përvojën e Shqipërisë në negociata. Ai vuri në dukje se suksesi i vendit tonë mbështitet në një përgjegjësi të fortë, në objektiva të qarta dhe ambicioze, si dhe në mbështetjen e vazhdueshme nga blloku dhe shtetet anëtare.

“Për çdo sukses në një proces aq të vështirë sa anëtarësimi në BE, vullneti i fortë politik është domosdoshmëri. Ne po bëjmë përpara në çdo çështje, sektor dhe reformë. Anëtarësimi nuk ka qenë kurrë i lehtë. Sot, megjithatë, procesi është më kërkues dhe kompleks se kurrë. Prandaj, është thelbësore të mbahet ritmi i reformave, të ruhet momenti në negociata dhe të sigurohet një angazhim i vazhdueshëm në çdo nivel. Koha është kritike, si për kandidatët ashtu edhe për besueshmërinë e procesit dhe vetë BE-së”, theksoi ministri Hoxha.

Ai shtoi se Shqipëria është plotësisht e vetëdijshme për fushat ku kërkohen përpjekje shtesë. Në veçanti, ai përmendi forcimin e mëtejshëm të sundimit të ligjit, por edhe sektorë të tjerë si menaxhimi i mbetjeve dhe ujërave, cilësia e ajrit, infrastruktura mjedisore dhe siguria ushqimore.

“Këto sfida kërkojnë koordinim të fortë, angazhim afatgjatë dhe investime të konsiderueshme. Procesi i anëtarësimit ka nevojë për çdo energji të mundshme, brenda vendit dhe nga partnerët tanë evropianë. Bashkëpunimi ynë duhet të bëhet më operacional, më konkret dhe më i qëndrueshëm”, deklaroi Hoxha.

“Siç kemi thënë edhe më parë, gjetja e mënyrave praktike për të lidhur ngushtë dhe shpesh ekspertët shqiptarë me strukturat dhe proceset e punës së Komisionit dhe BE-së do të na lejonte të përfitonim nga ekspertiza e tyre e çmuar. Kjo do të forconte më tej kapacitetin tonë administrativ dhe, më e rëndësishmja, do të thellonte njohuritë rreth funksionimit të institucioneve evropiane. Kjo do të ndihmonte që procesi i anëtarësimit të bëhej një përshpejtues i vërtetë i transformimit administrativ”, u shpreh ai.

Për ministrin e Jashtëm, kjo ngjarje vjen në një moment të rëndësishëm. Shqipëria, sipas tij, ka hyrë në një fazë vendimtare të rrugëtimit drejt BE-së.

“Ambicia jonë është e qartë, planet tona të punës janë realiste dhe vendosmëria jonë është e fortë. Ne do të vazhdojmë të japim rezultate dhe presim të njëjtin angazhim nga Bashkimi Evropian. Momenti politik për zgjerimin nuk ka nevojë për avokim. Fjalët kyçe mbeten ato të zakonshmet: zbatimi i reformave nga kandidatët dhe njohja e duhur e progresit nga shtetet anëtare”, përfundoi Hoxha.