Ambasadori i ri i SHBA shmangu takimin me Berishën, reagon kryebashkiaku socialist: Të la jetim LaCivita, të gllabëroi ato miliona dhe iku!

Kryebashkiaku socialist i Lezhës, Pjerin Ndreu, ka ironizuar kreun e Partisë Demokratike, Sali Berisha, me një postim në rrjetet sociale.

Në qendër të reagimit është ambasadori i ri amerikan në Tiranë, Eric Wendt. Sipas Ndreut, diplomati nuk e ka ftuar Berishën në pritjen e madhe të organizuar në zonën e ish-Bllokut dhe ende nuk ka zhvilluar asnjë takim me të.

Kryebashkiaku e lidh këtë fakt me vizitën e fundit të liderit demokrat në Shtetet e Bashkuara. Aty u përfol se atij i është hequr statusi “Non Grata”.

Ndreu kujton edhe bashkëpunimin e Berishës me Chris LaCivita, ish-këshilltarin e Donald Trump. Sipas tij, strategu amerikan u soll vjet në Shqipëri për të drejtuar fushatën zgjedhore të opozitës. Por tani, thotë Ndreu, LaCivita e ka lënë sërish jetim Berishën.

Në postimin e tij në Facebook, kryebashkiaku shkruan:

“Ore a iku i ripërtërirë ky Saliu në Amerikë, çka ka ky Ambasadori i ri i USA që nuk e takon?! Apo i dhanë një vizë me një thes me lekë me ndonjë lobim dhe i lanë njollën e përjetshme. Se na la edhe ai LaCivita që kushedi sa miliona euro gllabëroi dhe i lanë targën Saliut tonë duke e lënë jetim prapë! Aq qesharake u bë kjo histori, bashkë me ekzaltimin e militantëve miope sa skenari i një komedie do gajaste dynjanë dhe do bënte bujë ndërkombëtare! “