Ambasadori gjerman: Rusia po rrit presionin ndaj Gjermanisë dhe Europës

Ambasadori gjerman Wolfgang Ischinger vlerëson se reagimi i Berlinit ndaj veprimeve të Rusisë ishte i drejtë, dhe masat e reja kundër Moskës dërgojnë një sinjal të domosdoshëm. Megjithatë, ai nuk pret që presidenti rus Vladimir Putin të ndryshojë qëndrimin e tij. Këto komente Ischinger, që udhëheq Konferencën e Sigurisë në Mynih, i bëri gjatë një interviste në Romë.

Diplomati gjerman i cilësoi incidentet, si ai me dronin në aeroportin e Leipzigut, si shumë serioze dhe sipas tij, ato mund të konsiderohen akte lufte apo terrorizmi.

Gjermania ndodhet në shënjestër sepse ka ndryshuar më shumë se vendet e tjera evropiane politikën ndaj Moskës. Për vite me radhë, Berlini kishte thelluar bashkëpunimin ekonomik dhe energjetik me Rusinë. Por pas nisjes së luftës në Ukrainë, qeveria gjermane vendosi sanksione dhe rriti ndihmat për Kievin.

Sipas Ischinger, Rusia ka kuptuar se këto ndryshime mund të krijojnë probleme politike për qeverinë gjermane. Kjo veçanërisht vlen për pjesën lindore të vendit, ku partia e djathtë AfD gjen mbështetje të konsiderueshme dhe kërkon rikthimin e marrëdhënieve me Moskën.

Niveli i kërcënimit nga ana ruse po rritet. Ischinger shpjegoi se Moska po synon gjithnjë e më shumë shtetet që luajnë rol kryesor në furnizimin e Ukrainës me armë dhe ndihma. Gjermania është një prej tyre. "Moska dëshiron ta bëjë më të kushtueshme edhe mbështetjen për Kievin", tha ai.

Një pjesë thelbësore e strategjisë ruse mbetet kërcënimi bërthamor. Ischinger nënvizoi se Putin dhe zyrtarë të tjerë rusë përmendin vazhdimisht mundësinë e përdorimit të armëve bërthamore. Këto kërcënime, sipas tij, kanë një ndikim më të madh në Gjermani, ku opinioni publik është më i ndjeshëm ndaj kësaj çështjeje.

Ambasadori gjerman theksoi nevojën për më shumë bashkëpunim evropian në fushën e mbrojtjes. Duke u ndalur te rritja e shpenzimeve ushtarake gjermane, Ischinger tha se Berlini duhet të shpjegojë më qartë se forcimi i ushtrisë nuk synon rikthimin e fuqisë ushtarake kombëtare. Qëllimi është përmbushja e detyrimeve ndaj NATO-s dhe BE-së. Ai propozoi që një pjesë e fondeve të mëdha që Gjermania investon në mbrojtje të përdoret për projekte të përbashkëta evropiane.

Gjermania duhet të bashkëpunojë ngushtë me Francën, Italinë, Spanjën dhe shtete të tjera për të ngritur një induktri më të fortë evropiane të mbrojtjes. Ischinger shtoi se nuk sheh rrezik për rikthimin e militarizmit gjerman, pasi e ardhmja e vendit mbetet e lidhur ngushtë me NATO-n dhe Bashkimin Evropian.

Diplomati gjerman mbështet edhe formatin E5, që përfshin Gjermaninë, Francën, Britaninë e Madhe, Italinë dhe Poloninë. Sipas tij, këto pesë vende mund të përbëjnë bazën për një bashkëpunim më të fortë evropian në mbrojtje. Ischinger vlerësoi veçanërisht rolin e Italisë, duke u ndalur te ekonomia dhe industria e saj e rëndësishme e mbrojtjes.

Për luftën në Ukrainë, Ischinger tha se sulmet ruse ndaj infrastrukturës dhe civilëve po shoqërohen me një rritje të aftësisë së Ukrainës për të goditur brenda territorit rus. Sipas tij, nëse Kyivi vazhdon t'i shkaktojë dëme të mëdha Rusisë, presioni mbi Kremlinin për t'u ulur në tryezën e negociatave mund të rritet. Megjithatë, ambasadori pranoi se Moska aktualisht nuk duket e gatshme për një marrëveshje.

Europa ende nuk ka një strategji të përbashkët për rolin që duhet të luajë në negociatat për Ukrainën, sipas Ischinger. Ai u shpreh kundër debatit publik se kush duhet të jetë ndërmjetës midis Kievut dhe Moskës. Diplomacia e qetë dhe larg vëmendjes së publikut mund të jetë më efektive, argumentoi ai. Sipas tij, përpjekjet e të dërguarit amerikanë për të ndërmjetësuar një marrëveshje aktualisht kanë ngecur.