Ambasadori Eric Wendt nis sot detyrën si kryediplomat i SHBA-ve në Shqipëri, pritet t’i dorëzojë letrat kredenciale presidentit Begaj! Zbulohet ora e takimit

Misioni diplomatik i ambasadorit të ri të Shteteve të Bashkuara në Shqipëri, Eric Wendt, nis zyrtarisht këtë të shtunë. Ai do të paraqitet në Presidencë në orën 11:00.

Aty do të pritet nga Presidenti Bajram Begaj për dorëzimin e letrave kredenciale. Menjëherë pas ceremonisë, palët kanë parashikuar një bisedë kokë më kokë.

Wendt merr postin që mbahej më herët nga Yuri Kim. Ajo e mbylli mandatin në qershor të vitit 2023. Prej atëherë, përfaqësia amerikane në Tiranë është drejtuar nga Nancy VanHorn si e ngarkuar me punë.

Emërimi i tij u miratua në Senatin amerikan me 50 vota pro dhe 44 kundër. Gjatë seancës dëgjimore në komision, ai tha se forcimi i mëtejshëm i marrëdhënieve mes Shteteve të Bashkuara dhe Shqipërisë do të jetë një nga prioritetet e mandatit.

Ndër objektivat kryesorë renditi luftën kundër korrupsionit, krimit të organizuar dhe trafikimit të drogës. Po ashtu, theksoi nevojën për të zgjeruar bashkëpunimin dypalësh në fushën e mbrojtjes dhe sigurisë.

Diplomati amerikan vlerësoi kontributin e Shqipërisë si aleate e NATO-s. Ai shprehu mbështetje për shtimin e investimeve amerikane në sektorët strategjikë të ekonomisë shqiptare.