Alarm për bombë edhe në Gjykatën e Kukësit!

Mëngjesi i sotëm solli alarm për bombë në Kukës. Sinjalizimi ka prekur Gjykatën e Juridiksionit të Përgjithshëm dhe Prokurorinë e qytetit, pasi në adresën zyrtare elektronike të institucionit mbërriti një email kërcënues.

Sipas informacioneve, sapo mesazhi u konstatua nga punonjësit, u mor masa për evakuimin e plotë të stafit. Godina u rrethua menjëherë nga forcat e sigurisë. Ato nisën verifikimet në çdo ambient të brendshëm për të parë nëse kishte lëndë shpërthyese. Lajmi bëhet i ditur nga A2.

Në përmbajtjen e emailit, autori pretendonte se kishte vendosur një bombë brenda ambienteve të gjykatës. Ky pretendim vuri në lëvizje të gjitha strukturat përgjegjëse të sigurisë.

Kontrollet e imtësishme që pasuan në objekt përfunduan pa gjetur asgjë të dyshimtë. U verifikua se kërcënimi ishte i rremë. Asnjë mjet shpërthyes nuk u konstatua në godinë.

Episodi krijoi panik të momentit dhe pezulloi përkohësisht punën normale të institucionit. Masat u morën për të garantuar sigurinë e punonjësve dhe të qytetarëve që frekuentojnë përditë ambientet e Gjykatës dhe të Prokurorisë.