Aksident zinxhir në Tiranë-Durrës, humb jetën 45-vjeçari

Një aksident i rëndë rrugor është shënuar gjatë orëve të para të mëngjesit të sotëm në 7 shtator në autostradën Tiranë-Durrës, ku një 45-vjeçar ka humbur jetën.

Ngjarja ka ndodhur rreth orës 05:20 dhe në të janë përfshirë pesë automjete. Sipas policisë, 45-vjeçari H. B. është përplasur fillimisht me një kamion, duke humbur jetën në vendngjarje. Pas përplasjes, në aksident janë përfshirë edhe tre automjete të tjera.

Tre drejtuesit e mjeteve dhe pesë pasagjerë janë jashtë rrezikut për jetën. Ndërkohë, një grua, e dyshuar se drejtonte një prej automjeteve të përfshira, është larguar nga vendngjarja.

Ajo është shoqëruar nga policia për t’u marrë në pyetje dhe për të sqaruar rrethanat e aksidentit. Grupi hetimor vijon punën për zbardhjen e plotë të shkaqeve dhe rrethanave të ngjarjes.

Njoftimi i policisë

Durrës/Informacion paraprak

Rreth orës 05:20, në autostradën Durrës-Tiranë, janë përfshirë në një aksident rrugor 5 automjete.

Shtetasi H. B., 45 vjeç, është përplasur me një kamion dhe, si pasojë e përplasjes, ka humbur jetën në vendngjarje.

Më pas, në aksident janë përfshirë edhe tre mjete të tjera, me drejtues shtetasit G. L., 59 vjeç dhe J. I., 34 vjeç, si dhe 5 pasagjerë, të cilët ndodhen jashtë rrezikut për jetën.

Ndërsa shtetasja A. V., e cila dyshohet se ka qenë drejtuese e njërit prej automjeteve të përfshira në aksident, është larguar nga vendngjarja dhe është shoqëruar për të sqaruar rrethanat e ngjarjes.

Grupi hetimor dhe shërbimet e Policisë ndodhen në vendngjarje dhe po kryejnë veprimet e nevojshme hetimore për dokumentimin e plotë të ngjarjes, si dhe për sqarimin e rrethanave dhe shkaqeve të aksidentit.