“Agasit i çova ushqim, çfarë krimi kam bërë?” Çfarë deklaruan para GJKKO Sulejmani dhe Kalluçi

Gjykata e Posaçme ka lënë në burg shefin e Policisë Shkencore Fatjon Kalluçi dhe Embro Sulejmanin. Vendimi u mor pas seancës për skandalin te SHISH.

Të dy akuzohen për dosjen që lidhet me Ergys Agasin. Në ngarkim të tyre rëndojnë veprat “veprime që pengojnë zbulimin e së vërtetës” dhe “përkrahje të autorit të krimit”.

Gjatë seancës para GJKKO-së, Sulejmani u mbrojt me pretendimin se nuk ka kryer shkelje. “Nuk e di çfarë krimi kam bërë unë, që i kam çuar supë e ushqim”, deklaroi ai.

Ai pranoi se e njeh Agasin. Lidhja mes tyre, sipas tij, vjen nga origjina e përbashkët. Të dy janë nga Durrësi.

Një qëndrim mohues mbajti edhe oficeri i policisë shkencore. Kalluçi tha se nuk i kujtohet të ketë përcjellë akte sekrete te Agasi. Pikërisht këtë e pretendon SPAK në akuzën ndaj tij.

Ndërkohë pritet një tjetër seancë e rëndësishme. Në orën 12:00, para gjykatës do të dalë ish-drejtuesja e Shërbimit Informativ të Shtetit, Vora Hyseni.

Ajo është shkarkuar nga detyra. Gjykata do të verifikojë masat e sigurisë “arrest në shtëpi” dhe “pezullim nga detyra” të caktuara në mungesë ndaj saj. Hyseni dyshohet për “përkrahje të autorit të krimit” dhe “nxjerrje të sekretit shtetëror”. Seanca është parashikuar si marrje në pyetje.