Nëpërmjet një videomesazhi drejtuar maturantëve që do të rikthehen në bankat e shkollës më 18 maj, Ministrja e Arsimit në Shqipëri Besa Shahini ka përcjellë disa prej rregullave kryesore që duhet të ndiqen gjatë qëndrimit në shkollë në mënyrë që të mbrohet shëndeti i secilit maturant dhe familjarëve, shokëve dhe mësuesve të tyre.
Rregulli i parë është vendosja e maskës para shkollës dhe rreshtimi në distancë 1.5-2 metra nga njëri-tjetri, distancë e cila duhet të mirëmbahet gjatë gjithë qëndrimit në shkollë.
“Edhe ulja në klasat tuaja është organizuar në një distancë të tillë mes njëri-tjetrit. Nëse keni nevojë të përdorni dezinfektues gjatë qëndrimit në shkollë keni në bankat e shkollës nga një dezinfektues që mund të përdoret gjatë ditës”, ka thënë Shahini.
Shahini nënvizoi gjithashtu se në hyrje të secilës shkollë dhe në korridoret e secilit kat janë të vendosur posterë me ilustrime të thjeshta të rregullave kryesore që duhet të ndiqen nga maturantët gjatë qëndrimit në shkollë.
Në fund të video-mesazhit, Ministrja e Arsimit ka theksuar edhe rregullin kryesor për parandalimin e përhapjes së viruseve i cili është larja e shpeshtë e duarve.
Në lidhje me këtë, ajo njoftoi se “para tualeteve të shkollës janë vendosur posterë me hapat që duhet të ndiqen për një larje të thellë dhe të mirë të duarve”.
