Vizitën zyrtare në Gjermani ku ndodhet si i ftuar i Kancelarit Olaf Scholz, Kryeministri Rama e nisi me një takim mirëseardhjeje nga kryetarja e Bashkisë së Berlinit, Franziska Giffey.
Ambient në të cilin u rikthye pas shumë vitesh, që nga koha kur drejtonte Bashkinë e Tiranës.
Kryeministri Rama: Kam qenë këtu, por shumë kohë më parë, kur kam qenë kryetar bashkie.
Kryebashkiakja Giffey: Unë them që kur ke qenë njëherë kryetar bashkie, mbetesh i tillë pasi të mbetet ndjenja e përgjegjësisë për qytetarët.
Për disa minuta Rama pa nga afër godinën 100-vjeçare, planimetrinë e së cilës ia shpjegoi përmes një maketi kryebashkiakja Giffey.
Pas shënimit në librin e përshtypjeve, Rama e Giffey shkëmbyen dhurata mes tyre, ku Kryeministri mori simbolin e Bashkisë së Berlinit.
Ndërsa për kryebashkiaken Giffey ishte kujdesur t’i dhuronte një palë opinga tradicionale shqiptare të bëra me dorë.
Dhe pas daljes nga bashkia, Rama u befasua nga një qytetar, i cili e ndaloi duke i kërkuar një autograf në tre prej broshurave të librit të kryeministrit.
/abc24.al/
