Ekzistojnë gjasa reale që klubet elitare maqedonase të rikthehen në fushë këtë fundjavë, pas pauzës dymujore shkaku i pandemisë me koronavirus.
Gjatë ditës së nesërme, Qeveria e Maqedonisë së Veriut do ta mbajë një mbledhje, ku Ministria e Shëndetësisë dhe Stafi i Krizave do të propozojnë zbutjen e masave për përhapjen e pandemisë.
Nëse ndodhë kjo, klubet elitare që garojnë në Maqedoninë e Veriut, priten të rikthehen në stërvitje nën masa rigoroze.
Së pari, sikur në vendet tjera, skuadrat do të riktheheshin në stërvitje me dy apo katër futbollistë.
Më e rëndësishmja është se futbollistët dhe trajnerët më në fund do të dalin nga shtëpitë e tyre dhe do të punojnë në qendrat stërvitore të tyre.
Natyrisht, kjo do të thotë se kampionati i futbollit në Maqedoninë e Veriut nuk do të anulohet, por do të vazhdojë.
