Trajneri i Tottenhamit Jose Mourinho vijon të punojë si vullnetar në klubin londinez, duke shpërndarë perime të freskëta nga ferma e “Spurs” për njerëzit në nevojë, ndërsa ka folur edhe për futbollin.
Tekniku portugez ka deklaruar se i mungon shumë futbolli dhe se do të dëshironte që ky sezon i kampionatit të arrinte të mbyllej, ndonëse në stadiume me dyer të mbyllura, ashtu siç është parashikuar.
“Më mungon shumë futbolli dhe mezi pres të rikthehemi. Do të doja t’i luanim këto 9 javë që na kanë mbetur dhe të mbyllnim normalisht sezonin.
Të luash pa tifozë në shkallët e stadiumit është e vështirë, por mua më pëlqen të mendoj se futbolli nuk luhet asnjëherë pa tifozë, pasi miliona njerëz nëpër botë na ndjekin nëpërmjet telekamerave”, deklaroi portugezi.
