Asambleja e punës së Komitetit Olimpik të Kosovës, nuk kaloi pa probleme mbrëmë, shkak i pakënaqësive të më shumë se 24 delegatëve, të cilët lëshuan kuvendin!
Kjo ndodhi për shkak të disa pakënaqësive, të cilat më së miri i tregon kryetari i Federatës së Xhudos së Kosovës, Agron Kuka! Përveç Agron Kukajt dhe një pjesë e delegatëve, kuvendin e braktisi edhe krenaria e sportit të Kosovës dhe kombit shqiptar, kampionja olimpike, Majlinda Kelmendi.
Agron, cilat ishin arsyet që mbrëmë më më shumë se 24 veta, së bashku me Majlinda Kelmendi, lëshuat Kuvendin?
“Sa i përket kuvendit të rregullt të KOK-ut mbajtur mbrëmë, që nga fillimi i mbajtjes së tij kemi hasur në polemika sa i përket parregullsive në sfera të ndryshme dhe pas vërejtjeve legjitime të disa delegatëve prapë udhëheqësit e KOK-ut donin ta shtynin agjendën e tyre pa u argumentuar kërkesat e delegatëve.
Lëshimi i kuvendit ka ardhur spontanisht, pasi që udhëheqësit e KOK-ut vazhduan ta shtynin agjendën e tyre dhe shkuan deri aty sa edhe mohuan dhënien e fjalës.
Është e pahijshme për një institucion të tillë si KOK të sillet në asi mënyrë autoritare duke e marrë parasysh që sporti duhet të jetë shembull i tolerancës dhe mirësjelljes.
Arroganca duhet të zhduket nga institucionet sportive në vendin tonë dhe në pah të vinë vlerat që promovon sporti dhe sportistët”
, thotë Kuka për gazetën kombëtare “Bota sot”.
Pse arrogancë, a keni kërkuar votëbesimin?
“Jo, ne si Federatë s’kemi kërkuar votëbesim por kanë kërkuar 3 federata tjera që të futet në rend dite, por kuvendi ka degjeneruar para se të shkohet te kjo pikë”,
përgjigjet Kuka.
