Në fillim të kësaj jave ka përfunduar ndarja e pagës së parë nga FSHF, prej 30 mijë lekësh (të rinj). Teksa është njoftuar për fillimin e shpërndarjes edhe për muajin e dytë, proces i cili është në vazhdim. Gjatë kësaj jave, administrata e FSHF-së ka kërkuar nga klubet listën emërore të personave që plotësojnë kriteret për një pagesë të tillë, të bashkëngjitur me numrat e llogarive bankare të secilit. Qoftë pjesëtar i stafit të ekipit të parë apo edhe i klubit, krahas futbollistëve.
Gazeta është interesuar pranë institucionit të futbollit në vend dhe ka mësuar nga burime zyrtare se procesi i shpërndarjes ka nisur prej ditës së djeshme.
“Shpërndarja ka nisur dhe do të vijojë edhe nga e hëna e në vazhdim”, bëhet me dije nga FSHF. Gazeta ka mësuar gjithashtu se dje, në FSHF, sektori i financës ka bërë një analizë dhe raportim të plotë mbi këtë çështje te drejtuesit e lartë të institucionit. Njësoj si për pagesën e parë, nga e hëna e në vazhdim do të bëhet shpërndarja e plotë për të gjithë ata që e përfitojnë këtë pagesë.
Për muajin e parë, pati edhe raste që zyrtarë klubesh apo trajnerë të akademive nuk e përfituan si pasojë e faktit që ishin punonjës të regjistruar në bashkitë përkatëse, apo në ato raste kur kanë qenë të dypunësuar. FSHF, për shpërndarjen e këtyre dy pagesave prej 30 mijë lekësh (të rinj), ka bërë me dije se bëhet fjalë për një fond total që shkon deri në 80 milionë lekë (të rinj).
