Erëra të fuqishme po i egërsojnë zjarret në veri të Kalifornisë siç nuk ka ndodhur historikisht, njoftuan autoritetet të dielën, pasi dhjetëra e mijëra persona u urdhëruan të evakuohen dhe në këtë shtet të SHBA filluan ndërprerjet e energjisë elektrike. Shkulme ere prej 80 km në orë po i ushqejnë zjarret në Kincade, që kërcënojnë mijëra godina duke shkaktuar djegie me intensitet të lartë në një terren të pjerrët në veri të San Francisko. Sherifi i qarkut Sonoma lëshoi mëngjesin e së dielës një paralajmërim për evakuimin e pjesës më të madhe të qytetit Santa Rosa, që ka një popullsi prej 180 mijë banorësh. Afro 90 mijë prej tyre u urdhëruan të ikin nga shtëpitë e tyre të shtunën ndërkohë që zjarri në qarkun Sonoma u përhap pas mesdite. 77 godina, përfshirë 31 shtëpi, u shkatërruan nga zjarri të shtunën. Më shumë se 2800 zjarrfikës u thirrën në vendin e ngjarjes. “Kjo që po ndodh është nga më ekstremet dhe historike”, tha Davis King, një meteorolog për Los Angelos Times.
