Emiljano Shullazi ka lënë qelinë e burgut të sigurisë së lartë 41 Bis dhe është transferuar tek burgu 313.
Shullazit i ka përfunduar afati i izolimit për të qendruar në burgun 41 Bis. Arbjon Aliko e Genci Balla gjithashtu e kanë përfunduar afatin për të qendruar në regjimin 41 Bis.
Vendimi për daljen e tyre është ekzekutuar ditën e djeshme, ku nga ora 8:30 e mëngjesit deri më 18:00 ata janë trasferuar në burgje të sigurisë së lartë, ku do vuajnë pjesën tjetër të dënimit.
Ndërkohë që në qelitë e “41 bis” vijojnë të jetë të izoluar Redjan Rraja, Arbër Çekaj, Aleksandër Llanaj, Viktor Ymeri, e vëllezerit Klemend e Eldi Cala.
Regjimi 41 Bis ka nisur të aplikohet në burgjet e vendit tonë në janar të vitit 2019, i marrë nga përvoja italiane. Thelbi i këtij regjimi është nevoja për të penguar komunikimin e të burgosurve me njerëz nga jashtë. Në këtë mënyrë bosët e mafies nuk mund të kenë komunikime të mundshme me organizatat kriminale. Kështu, atyre u bllokohet mundësia që të japin urdhra për vrasje dhe krime ndërkohë që janë në burg. Limitimi i numrit të takimeve me familjarët, është një ndër rregullat strikte, ku saktësohet maksimumi 1 takim në muaj.
Po ashtu ndalohet kontakti fizik me familjarët, ndërsa çdo bisedë mes tyre është e regjistruar. Të burgosurit kanë mundësinë e një telefonate 10 minutëshe në muaj, edhe ajo e regjistruar. Çdo korrespondencë me jashtë do të jetë e kontrolluar. Të burgosurit i ndalohet çdo objekt personal në qeli, si stilolaps, blloqe apo lekë. Të burgosurit janë aq të vëzhguar sa është e pamundur të komunikojnë mes të dënuarve, të gatuajnë, të shkëmbejnë objekte dhe janë grupe sociale të ndryshme të dënuarish.
