Një ngjarje e rëndë u shënua pasditen e sotme në Tiranë. Bëhet fjalë për një aksident me pasojë vdekjen e një të riu dhe plagosjen rendë të një tjetri.
24-vjeçari me inicialet G.M mbeti i vdekur pas përplasjes së një makine ku ai udhëtonte si pasagjer, ndërsa K.M, 26 vjeç, i cili mendohet se ka lidhje familjare me viktimën, mbeti i plagosur rëndë.
Mësohet se makina tip Benz C-Class ngjyrë gri me targë, AA 861 SE udhëtonte me shpejtësi tej normave të lejuara dhe ka dalë nga rruga në fshatin Zall-Bastar.
Vetë drejtuesi i mjetit ka mbetur i plagosur ndërsa ndodhet në spital nën kujdesin e mjekëve. Policia ka mbërritur në vendngjarje për të zbuluar shkaqet dhe rrethanat e aksidentit të rëndë të shënuar në rrugën e Zallbastarit në vendin e njohur si “Rrapi”.
“Në rrugën e Zallbastarit, në vendin e quajtur “Rrapi”, një mjet ka dal nga rruga dhe për pasojë ka ndërruar jetë pasagjeri në mjet shtetasi G.M., 24 vjeç, ndërsa drejtuesi i mjetit shtetasi K.M., 26 vjeç, është dërguar menjëherë në spital, dhe ndodhet nën kujdesin e mjekëve. Grupi hetimor ndodhet në vendngjarje dhe vijon punën për zbardhjen e rrethanave të ngjarjes.”, njofton policia e Tiranës.
